حاجات الناس ما بقولوا ليك عنها في المنح

المنح ما بس عن القبول والفرحة بالصورة الأخيرة. اخترنا نتكلم عن الجانب التاني: الحاجات البسيطة لكن المهمة، والواقع البنشوفو لكن ما دايمًا بنتكلم عنو.

ولشباب السودان والشباب المتأثرين بالحرب والنزوح، الطريق ممكن يكون أصعب. توقف الدراسة، وتغيّر المكان، وقلة الوصول للمعلومات والفرص كلها تحديات حقيقية. لكن ده ما معناهو إن الفرص انتهت.

ما بنتكلم عن الحاجات دي عشان نحبطك، بالعكس: عشان تكون مستعد.

١. لازم تتعب وتشتغل على نفسك

الحصول على منحة ما حاجة سهلة. في العادة بيكون في مئات، وأحيانًا آلاف المتقدمين، على عدد محدود من المقاعد.

٢. درجاتك لوحدها ممكن ما تكون كفاية

في منح وبرامج كتيرة بتنظر كمان للأنشطة خارج الدراسة، والقيادة، والمشاركة المجتمعية، والاهتمامات، والإنجازات، والحاجات البتعملها والأثر البتخليه.

٣. وفي نفس الوقت، الدرجات العالية ما شرط تكون مطلوبة في كل المنح

كل منحة عندها معايير مختلفة. بعض المنح بتركز بشكل كبير على التحصيل الأكاديمي، بينما منح تانية ممكن تهتم أكثر بالقيادة، والمشاركة المجتمعية، والإمكانيات، والتجارب الشخصية، أو ظروف المتقدم.

٤. لازم تبدأ الاستعداد بدري

بناء ملف قوي بياخد وقت. ما تستنى لحدي ما يفتح التقديم عشان تبدأ تفكر في مهاراتك، وتجاربك، وأنشطتك، وأهدافك.

٥. ممكن تترفض

وده جزء طبيعي من رحلة التقديم. الرفض من فرصة واحدة ما معناهو إنك ما مؤهل أو ما قادر.

الطريق ما ساهل، لكن ما مستحيل. آلاف الناس وصلوا قبلك، وإنت كمان ممكن تكون واحد منهم. ابدأ بدري. اشتغل على نفسك.